Филиппины бүлэг  арлууд буюу 7107 арлуудын нэг нийслэл  Манила хотоос урагш  315 км-т   орших  Борокэй арал нь дэлхийн хамгийн үзэсгэлэнтэй арлуудын нэгд тооцогддог.  Эрвээхэйн хэлбэртэй энэхүү арал нь  уртаараа 7 км, өргөнөөрөө  1 км хэмжээтэй. Борокэй арал нь  Аклан мужийн нэг хэсэг юм.
Анхны оршин суугчид энэ нутагт 1212 онд  ирсэн түүхтэй. Эдгээр анхны  уугуул хүмүүс нь  Африкийн "Атис"  эсвэл "Нагритос"  омгийнхон байсан аж. Удалгүй Малайн арлуудын нэг болох   Борнео арлаас  10 бүлэг цагаач үндэстнүүд энэ  нутагт нүүж ирсэн .  Атисчууд энэ аралд анх гишгэнгүүтээ  нунтаг цагаан элсийг нь үзээд "Борай" гэж  нэрлэжээ. Энэ нь цагаан хөөс гэсэн утгатай. Үүнээс улбаалан Борокэй гэдэг нэр үүссэн байна.
            
Борокэй  арал нь  ер бусын  торгон зөөлөн элстэй наран шарлагын газар, дулаан орны   гайхалтай байгаль, эрдэнийн чулуу шиг цэвэр тунгалаг усаараа алдартай. Энэхүү гайхамшигт арлыг 1970 онд Германы жуулчин нээсэн бөгөөд арлын гоё сайханыг магтан өөрийн номондоо "газар дээрх диваажин " гэж бичсэн байдаг. 1990 онд BMW Tropical Beach Handbook-ээс дэлхийн хамгийн үзэсгэлэнтэй  далайн эргээр, мөн 2007 онд Yahoo travel-ээс зарласан  "World's most popular beach" шалгаруулалтад 1-р байр эзэлсэн юм.